بەپێی ڕاگەیاندنی بەشی پەیوەندییە گشتییەکانی زانکۆی کوردستان، ڕێوڕەسمی ڕێزلێنان لە پێشەنگە زانستییەکانی وڵات، ڕۆژی شەممە ٢٩ی سەرماوەزی ١٤٠٤ بە ئامادەبوونی بەرپرسانی باڵا و کۆمەڵێک لە نوخبە و توێژەرانی بەرچاوی زانکۆیی لە ناوەندی کۆنفرانسە نێودەوڵەتییەکانی ئێران بەڕێوە چوو.

لەم بۆنە نیشتمانییەدا، دکتۆر کەیومەرس کەرەمی، پرۆفیسۆری بەشی فیزیکی زانکۆی کوردستان، بەهۆی کارنامەی درەوشاوەی توێژینەوە و بڵاوکردنەوەی بەرهەمی بەنرخ لە ئاستی نێودەوڵەتیدا، سەرکەوتوو بوو لە بەدەستهێنانی نازناوی «پێشەنگی زانستیی وڵات».

پێوەرەکانی هەڵبژاردن؛ تێپەڕاندنی سنوورەکانی زانست
بەرنامەی نیشتمانیی پێشەنگە زانستییەکان کە لە ساڵی ١٣٩٤ەوە بە ئامانجی ناسینەوە و پشتیوانیکردن لە توێژەرانی پێشەنگ دەستی پێ کردووە، ئەو توێژەرانە هەڵدەبژێرێت کە بە بڵاوکردنەوەی وتار لە گۆڤارە باوەڕپێکراوە نێودەوڵەتییەکاندا، سنوورەکانی زانستیان فراوانتر کردووە.
بە وتەی سەرۆکی بونیادی نیشتمانیی زانستی ئێران، پێوەری سەرەکیی هەڵبژاردن لەم خولەدا، کوالێتی و زەریبەی کاریگەریی ئەو بەرهەمانە بووە کە لە گۆڤارەکانی گرووپی «ئەلف» تا «د» لە ساڵی ٢٠٢٤ی زایینیدا بڵاو کراونەتەوە. لەم خولەی هەڵسەنگاندنەکاندا، کارکردی زانستیی ٢٠٣٠ نووسەر و توێژەری ئێرانی کە سەرکەوتوو بوون لە بڵاوکردنەوەی ٨٥٧ وتار لە ١٣٥ گۆڤاری باوەڕپێکراوی نێودەوڵەتیدا، بە وردی چاودێری کراوە.

جێگەی باسە لە ڕیزبەندیی دامەزراوە زانستییەکانی وڵات لە ساڵی ١٤٠٤دا، زانکۆکانی سەنعەتی شەریف و تاران (بە هاوبەشی) و زانکۆی تەربیەت مودەریس پلە باڵاکانیان بەدەست هێناوە و زانکۆی کوردستانیش بەم دەستکەوتە بەنرخە، پێگەی خۆی لەنێو زانکۆ کاریگەرەکانی وڵاتدا بەهێزتر کرد.