سیستەمی ڕیزبەندیی جیهانیی گرین‌مەتریک (UI GreenMetric) کە لەلایەن زانکۆی ئەندەنووسیاوە دامەزراوە، وەک یەکێک لە باوەڕپێکراوترین پێوەرە نێودەوڵەتییەکان بۆ هەڵسەنگاندنی ئاست و پابەندبوونی دامەزراوەکانی خوێندنی باڵا بە چەمکەکانی گەشەپێدانی بەردەوام، بەڕێوەبردنی سەوز و پاراستنی ژینگە دادەنرێت. لە حەڤدەهەمین خولی ئەم هەڵسەنگاندنەدا (ساڵی ٢٠٢٦)، ٢٠١٦ دامەزراوەی خوێندنی باڵا لە ١١٠ وڵاتی جیهانەوە بەشدارییان کرد. ئەم خولە بە تەوەر و دروشمی «پێشخستنی کەمپەسە بەردەوامەکان لە ڕێگەی حوکمڕانی، بەدیجیتاڵیکردن و ئەدای یەکگرتوو» بەڕێوەچوو.

بوارەکانی هەڵسەنگاندن و تەوەرە سەرەکییەکانی گرین‌مەتریک:

پێوانەکردنی ئاستی زانکۆکان لەم سیستەمە نێودەوڵەتییەدا لەسەر بنەمای ئەم تەوەرە ژینگەیی و کارگێڕییانەی خوارەوە ئەنجام دەدرێت:

• ژێرخان و ژینگە: هەڵسەنگاندنی پانتاییی ڕووبەری سەوز و گونجاوبوونی فەزا فیزیکییەکانی کەمپەس.

• وزە و گۆڕانی ئاووهەوا: پێوانەکردنی ئاستی کاراییی وزە و بەکارهێنانی سەرچاوە نوێبووەوەکان.

• بەڕێوەبردنی پاشماوە: پێداچوونەوە بە بەرنامەکانی جیاکردنەوە، ڕیسایکڵکردن و کەمکردنەوەی بەرهەمهێنانی پاشماوە.

• بەڕێوەبردنی بەکارهێنانی ئاو: هەڵسەنگاندنی بەرنامەکانی دەستپێوەگرتن و دووبارە بەکارهێنانەوەی سەرچاوەکانی ئاو.

• گواستنەوەی بەردەوام: پەرەپێدانی گواستنەوەی پاک و ئاسانکاری بۆ هاتووچۆی بێ‌پیسکەر لە کەمپەسدا.

• پەروەردە و توێژینەوە: لێکۆڵینەوە لە چالاکییە توێژینەوەییەکان و پڕۆژەکانی پەیوەندیدار بە گەشەپێدانی بەردەوام.

• حوکمڕانی و بەدیجیتاڵیکردن: زیرەککردنی پرۆسەکان و یەکخستنی سیاسەتەکانی بەردەوامی لە ئاستی زانکۆدا.

بەرزبوونەوەی پێگەی زانکۆی کوردستان لە هەڵسەنگاندنی نوێدا:

زانکۆی کوردستان بە بەدەستهێنانی ٥٨٤٧.٥ خاڵ، توانی پلەی ٩٢١ لە ڕیزبەندیی جیهانی و پلەی ١٢ لەنێو زانکۆکانی وڵاتدا تۆمار بکات.

بەراوردکردنی ئەنجامەکانی ئەم خولە لەگەڵ ئاستی ساڵی ڕابردوو، نیشاندەری گەشەی بەردەوامی پێگەی زانکۆیە؛ بە جۆرێک کە ئەم زانکۆیە لە ساڵی ٢٠٢٥ خاوەنی پلەی ٩٦٧ی جیهانی و ٢٠ی نیشتمانی بووە و لە هەڵسەنگاندنی ساڵی ٢٠٢٦دا بە سەركەوتنی ٤٦ پلە لە ئاستی نێودەوڵەتی و ٨ پلە لە ئاستی نیشتمانیدا بەرەوپێشچوونی تۆمار کردووە.

ئارەزوومەندان بۆ بینینی خشتەی تەواوی ڕیزبەندییەکە دەتوانن سەردانی ماڵپەڕی فەرمیی ئەم پێگەیە بە ناونیشانی https://uigreenmetric.com/rankings/university/overall-rankings-2026 بکەن.