بەپێی ڕاگەیاندنی بەشی پەیوەندییە گشتییەکانی زانکۆی کوردستان، ئەم وۆرکشۆپە فێرکارییە ڕۆژی دووشەممە، ڕێکەوتی ١٢ی خەزەڵوەری ١٤٠٤، بە ئامادەبوونی بەڕێز کەیوان وەیسی، بەڕێوەبەری گشتیی پدافەندی غەیرەعاملی پارێزگای کوردستان، لە هۆڵی کۆبوونەوەکانی زانکۆ ساز کرا. ئامانج لەم کۆبوونەوەیە، تواناسازکردنی کارمەندانی ئاسایش و سەرپەرشتیارانی بەشەناوخۆییەکان بوو لە ڕووبەڕووبوونەوەی قەیران و هەڕەشە نوێیەکاندا.

زانکۆ؛ پێشەنگی هۆشیارکردنەوەی کۆمەڵگە
بەڕێز وەیسی لەم وۆرکشۆپەدا، پدافەندی غەیرەعاملی وەک «کۆمەڵێک ڕێکاریی ناچەکدارانە کە دەبێتە هۆی بەرزکردنەوەی توانست و خۆڕاگریی نیشتمانی و ئاسانکاری لە بەڕێوەبردنی قەیرانەکاندا» پێناسە کرد و گوتی: «زانکۆ وەک ناوەندێکی پێشەنگی زانستی و فەرهەنگی، دەتوانێت پێشەنگ بێت لە گواستنەوەی هۆشیاری لە بواری پدافەندی غەیرەعاملدا بۆ سەرجەم چین و توێژەکانی کۆمەڵگە.» ناوبراو بە جەختکردنەوە لەسەر بەردەوامیی هەڕەشەکان بە شێوازی نوێ، هۆشیاریی کارمەندانی جێبەجێکاری زانکۆی بە بابەتێکی ژیانی دانا و چەمکەکانی وەک بڕیاردانی ژیرانە لە کاتی قەیراندا، بەرەنگاربوونەوەی پڕوپاگەندە، پووچەڵکردنەوەی شەڕی دەروونی و پاراستنی گیان و ماڵی قوتابییانی وەک بنەما سەرەکییەکانی پدافەندی غەیرەعامل لە ژینگەی زانکۆدا ناو برد.

کارمەندانی زانکۆ؛ هێڵی پێشەوەی پەیوەندی لەگەڵ قوتابیان
لە سەرەتای کۆبوونەوەکەدا، بەڕێز مێیسەم مونتەشلوو، بەرپرسی فەرمانگەی پاراستنی بەڵگەنامەکان لە بەڕێوەبەرایەتیی حەراسەتی زانکۆ، ئامانجی بەڕێوەچوونی ئەم وۆرکشۆپەی بە بەرزکردنەوەی ئاستی هۆشیاری و دروستکردنی گفتوگۆ لەم بوارەدا زانی. ناوبراو ڕایگەیاند: «کارمەندانی ئاسایش و سەرپەرشتیارانی بەشەناوخۆییەکان، وەک هێڵی پێشەوەی پەیوەندی لەگەڵ کۆمەڵگەی قوتابیاندا، ڕۆڵێکی سەرەکییان هەیە لە پێشگرتن لە مەترسییە ئەگەرییەکان و بەڕێوەبردنی دروستی بارودۆخەکاندا.»

وۆرکشۆپەکە بە پانێڵێکی پرسیار و وەڵام لەنێوان بەشداربووان و بەڕێوەبەری گشتیی پدافەندی غەیرەعاملی پارێزگادا کۆتاییی هات.