بەپێی ڕاپۆرتی پەیوەندییە گشتییەکانی زانکۆی کوردستان، کۆبوونەوەی دەستەی سەرۆکایەتیی زانکۆ لەگەڵ جێگری پلاندانانی وەزارەتی نەوت، بە تەوەرەی پەرەپێدانی ژێرخانە زانستی و خۆشگوزەرانییەکان، ڕۆژی ١٤ی ڕێبەندان لە باڵەخانەی ئەم وەزارەتە بەڕێوە چوو. ئەم دیدارە بە ئامانجی ڕاکێشانی پاڵپشتییەکانی کەرتی پیشەسازی لە چوارچێوەی جێبەجێکردنی بەرپرسیارێتییە کۆمەڵایەتییەکانی وەزارەتی نەوت و بەهێزکردنی پەیوەندی نێوان زانکۆ و پیشەسازییە گەورەکانی وڵات ئەنجام درا.

لەو کۆبوونەوەیەدا، بەرپرسانی زانکۆی کوردستان ڕاپۆرتێکی گشتگیریان سەبارەت بە تواناکانی زانکۆ، پڕۆژە توێژینەوەیییەکان و ئەو ئاستەنگانەی لەبەردەم پەرەپێدانی ژێرخانە خۆشگوزەرانی و تاقیگەییەکاندا هەن، پێشکەش کرد. هەروەها جەخت لەسەر تواناکانی ئەم زانکۆیە بۆ هاوکاری هاوبەش لەگەڵ کۆمپانیاکانی سەر بە وەزارەتی نەوت لە بوارەکانی توێژینەوە و تەکنەلۆژیادا کرایەوە.

جێگری پلاندانانی وەزارەتی نەوت وێڕای دەربڕینی خۆشحاڵی بە چالاکییە زانستییەکانی زانکۆی کوردستان، ئامادەیی خۆی بۆ پاڵپشتیکردنی گەشەی زانکۆ لە چوارچێوەی پڕۆژە ئامانجدارەکاندا ڕاگەیاند. ناوبراو جەختی کردەوە کە وەزارەتی نەوت ئامادەیە لە ڕێگەی بەهێزکردنی کەرەستەی تاقیگەیی پەیوەندیدار بە پیشەسازییەکانی نەوت و پێترۆکیمیا و هەروەها باشترکردنی شوێنی خۆشگوزەرانیی خوێندکاران، هەنگاوی کاریگەر بنێت. لە کۆتایی دانیشتنەکەدا ڕێککەوتن کرا کە پێش کۆتایی هاتنی ئەمساڵ، دوو پڕۆژەی پراکتیکی لە بوارەکانی تەیارکردنی تاقیگەکان و پەرەپێدانی ژێرخانە خۆشگوزەرانییەکان، بۆ پێداچوونەوەی کۆتایی و تەرخانکردنی بودجە پێشکەش بە وەزارەتی نەوت بکرێن.